مغامرات بين الكتب

السلام عليكم، اسمي ريان الريامي واليوم قررت اشارككم شيء من الأشياء الي سمحلي الحجر اني اسويها وخلاني أنمي مهاراتي فيها وهي القراءة.

طبعا مما لا شك فيه انه صار عندنا فائض من وقت الفراغ خلال الحجر وخصوصا بعد انتهاء العام الدراسي وشخصيا حاولت اني استغل هذا الوقت في القارءة ، يمكن الاغلب يخطر في باله انه استغلال الوقت لازم يكون لتنمية مهاراتنا العلمية والعقلية بس لا هذا المفهوم خاطئ جدا ، لازم خلال هذي الفترة نعطي اهتمام كافي لصحتنا النفسية ، حاولوا انكم تسووا كل شيء تحبوه في الحياة وانا اليوم قررت اشارككم الكتب الي قرأتها وحبيتها وشفت الجمال فيها فقلت اشارككم إياها عشان كلنا نتشارك هذا الجمال في الكتب ، احب أنوه لنقطة انه بدايتي في القراءة كانت قبل سنة يعني ما شرط يكون حب القراءة فيكم من وانتوا صغار لا، بس الشيء الي كلنا نشترك فيه كبشر هو حب المعرفة ، وهذي المعرفة ممكن تكون أحد مصادرها الكتب.

1- أول كتاب بتكلم عنه هو كتاب أشياء لن تستطيع أن تتخيلها للكاتب الدكتور محمد القاسم، هذا الكتاب هو كتاب علمي والاغلب يشوف انه الكتب العلمية مملة واحيانا صحيح اتفق مع هذي النقطة بس هذا الكتاب يختلف عن اي كتاب علمي اخر فيه انه أسلوب الكاتب ممتع جدا لدرجة تخليكم تخلصوا الكتاب بسرعة الضوء (بما انه الضوء اسرع شيئ).

2- ثاني كتاب عبارة عن رواية الفتى النبيل للكاتبة فرانسيس هوجسن بيرنت ، قبل كنت ما احب الروايات ابدا وكثير اشوف انه قراءتها عديمة الفائدة بس بعد قراءتي لاغلب روايات منشورات تكوين تغيرت نظرتي للروايات بشكل جذري ، رواية الفتى النبيل كتبت عشان تصلح بين الشعب الأمريكي والشعب البريطاني الي كان بينهم حقد وكراهية في بدايات الثورة الامريكية ، الرسالة الأخلاقية الي بتستفيدوا منها بعد قراءتكم لهالرواية عظييمة جدا وانصح فيها أي شخص يريد يدخل لعالم القراءة.

3- اخر كتاب بقترحه لكم هو كتاب الجاعد الأبيض للكاتب خالد بن سليمان الكندي, طبعا كلنا نعرف كيف انه مهم جدا لنا كعمانيين نعرف تاريخ بلادنا الجميلة ونعرف الشخصيات المؤثرة في التاريخ العماني، واهم هذي الشخصيات هو الشيخ عبدالله الريامي ، يمكن بعد فيه كثير ناس ما يحبوا التاريخ بس هذي الرواية بتخليكم تحبوا التاريخ كثير، لانه الكاتب استخدم أسلوب روائي لتناول سيرة هذي الشخصية العظيمة والأسلوب الروائي دايما يجذب القارئ للقراءة.

هذي افضل ثلاث كتب قرأتها خلال فترة الحجر وانصح الكل يقرأها ومتأكد ما راح تندمو.

• بخط ريان الريامي - rayyan.alr@